የላሊበላ ፍልፍል አብያተ ክርስቲያን

የላሊበላ ፍልፍል አብያተ ክርስቲያናትን ከአለት በመፈልፈል ያነፃቸው ከ11ዱ የዛጉዬ ነገስታት አንዱ የሆነው ቅዱስ ላሊበላ /1120 – 1197 ዓ.ም/ ነው፡፡እነዚህ በአሰራር ጥበባቸው ዓለምን ያስደመሙና በመንፈሳዊ መዓዛ የተሞሉ አብያተ ክርስቲያናት፤ ከኢትዮጵያን የጥበብ መኩሪያ እና ሃብትነት ባሻገር የተባበሩት መንግስታት ድርጅት የትምህርት፣የሳይንስ እና የባህል ድርጅት (ዩኔስኮ) በ1979ዓ.ም የአለም ቅርስ ሆነው ተመዝግበዋል፡፡
10689806_10203612432565382_4261186185195982725_n

የቅዱስ ላሊበላ ፍልፍል አብያተ ክርስቲያናት፡- ቤተ ማሪያም ፣ ቤተ መድኃኔዓለም፣ ቤተ ደናግል፣ ቤተ መስቀል፣ ቤተ ደብረሲና፣ ቤተ ጎለጎታ፣ ቤተ አማኑኤል፣ ቤተ አባ ሊባኖስ፣ ቤተ መርቆሬዎስ፣ ቤተ ገብርኤል ወሩፋኤል፣ ቤተ ጊዮርጊስ የተሰኙ ቤተ ክርሰቲያናትን ይዟል፡፡ ቤተ ደብረሲና አልፎ አልፎ ቤተ ሚካኤል በመባል ይጠራል፡፡ የቅዱስ ላሊበላ መካነ መቃበር የሚገኘውም በዚሁ በቤተ ደብረሲና ነው፡፡ ይሄ ቤተክርስቲያን ከቤተ ጎለጎታ ጋር ተያይዞ የታነፀም በመሆኑ(Twin Churches) ቤተ ሚካኤል ወጎለጎታ ተብሎ እንደ አንድ ስለሚቆጠር የላሊበላ አብያተ ክርስቲያናት ቁጥር 10 ናቸው የሚልም አስተያየት አለ፡፡

10687206_10203612433885415_5664258224509548149_n

ቤተ ማሪያም የቅዱስ ላሊበላ የመጀመሪያ ስራ ስትሆን ታህሳስ 29 የልደት በዓልም በዚች ቤተክርስቲያን ነው በድምቀት የሚከበረው፡፡ ቤተ መድኃኔዓለም በመጠን ከሁሉም የሚበልጥ እና “አፍሮ አይገባ” የተባለው መስቀል የሚገኝበት ነው፡፡ ቤተ ጊዮርጊስ የሚባለው ደግሞ በመስቀል ቅርፅ የታነፀ እና ከሌሎቹ በተለየ ሁኔታ ረቂቅ የኪነ ህንፃ ጥበብ የተከናወነበት ነው፡፡ ቅዱስ ላሊበላ እነዚህን አብያተ ክርሰቲያናት ለማነፅ ከ22 – 30 ዓመታት ፈጅቶበታል ይባላል፡፡
church20lalibela

ከ1512 – 1518 ኢትዮጵያን የጎበኘው የፖርቹጋል ቄስ ፍራንሲስኮ አልቫሬዝ /ላሊበላን የጎበኘ የመጀመሪያው አውሮፓዊ/ እንዲህ ብሎ ነበር፡- “ስለ ላሊበላ ፍልፍል አብያተ ክርስቲያናት ስራዎች ብዙ ብፅፍ የሚያምነኝ ሰው መኖሩ በጣም ያሳስበኛል፤ያስጨንቀኛል፡፡ እስካሁን ያልኩትንም እንኳን ቢሆን “ውሸት ነው” የሚሉኝ፡፡ ነገር ግን የፃፍኩት በሙሉ እውነት ለመሆኑ በኃያሉ እግዛብሔር ስም እምላለሁ፡፡ እንዲያውም ከዚህ በላይ ማለት ይቻላል፡፡ ሆኖም በቀጣፊነት ስሜ እንደማይነሳ ተስፋ አደርጋለሁ፡፡”

ምንጭ ፡- ህብር ኢትዮጵያ መፅሃፍ

Leave a Reply