ለእይታ ያልታደሉ ቅርሶች ………

የታዕካ ነገስት በዓታ ለማርያም ህንፃ ቤተ ክርሲቲያንን ለመስራት 10 ዓመታትን ፈጅቷል፡፡ ከ1910 እስከ 1920 ዓ.ም ድረስ፡፡ ህንፃ ቤተ ክርስቲያኑን ያሰሩት የዳግማዊ አፄ ምኒልክ 3ኛ ልጅ የነበሩት ግርማዊት ንግስተ ነገስት ዘውዲቱ ምኒሊክ ናቸው፡፡ ንግስት ዘውዲቱ ይህን ህንፃ ቤተ ክርስቲያን እና በውስጡ ያለውን ሙዚየም ለአባታቸው መልካም ስራ መታሰቢያ እና ለአፅማቸው ማረፊያ በማለት እንዳሰሩት ይነገራል፡፡
10885048_10204199513602041_3652980852665574592_n

በቤተ ክርስቲያኑ የውስጥ ክፍል አራቱም አቅጣጫ የሀገሪቱን ታሪክ የሚያወሱ ስዕሎችን ተመልክተው ወደ ምድር ቤት ሲወርዱ አነስ ያለችውን የበዓታ ሙዚየም ያገኛሉ፡፡ በዚች አነስተኛ ሙዚየም ውስጥ ለአይን የሚያስገርሙ ፣ ተጎብኝተው የማይጠገቡ ቅርሶችን ያያሉ፡፡ እነሱም የትላንት የጥበብ እድገታችን እና የስልጣኔ ጉዞአችን የት ድረስ እንደነበር ያመላክታሉ፡፡
10888959_10204199533482538_5419787423106033242_n

በቅድሚያ በ1924 ከግሪክ ቤተ ክርስቲያን ለግርማዊት ንግስተ ነገስት ዘውዲቱ ምኒልክ የተበረከተላቸውን የእየሱስ ክርስቶስ የግንዘት ምስል ከመስተዋት በተሰራ ሳጥን ያገኛሉ፡፡ ከዚህ እይታ ባሻገር አይንዎትን ሲያማትሩ ሶስት መካነ መቃብሮችን በመደዳ ተሰድረው ይመለከታሉ፡፡ / የዳግማዊ አፄ ምኒልክ ፣ የግርማዊት እቴጌ ጣይቱ ብጡል ፣ የንግስተ ነገስት ዘውዲቱ ምኒልክን/፡፡ ከዚህ ፈንጠር ብለው ደግሞ የግብፁን ሊቀ ጳጳስ የአቡነ ማቴዎስ እና የልዕልት ፀሀይ ኃይለስላሴን መካነ መቃብሮች ያገኛሉ፡፡

10525902_10204199536362610_571033008729483707_n

እነዚህ ብቻ አይደሉም በሙዚየሙ ውስጥ ከ100 አመት በላይ እድሜ ያላቸው ወንበሮችን አይተው ይደነቃሉ፡፡ እነዚህ ወንበሮች አንዱ የዳግማዊ አፄ ምኒልክ ተንቀሳቃሽ ወንበር ሲሆን በአደዋ ጦርነት ጊዜም አብሯቸው ሄዶ ሲያስቀድሱ ይጠቀሙበት እንደነበር ይነገራል፡፡ ሌላው ወንበር ደግሞ የግርማዊት ንግስተ ነገስት ዘውዲቱ ሲሆን እሱም ንግስቲቱ ዳዊት ሲደግሙ ይጠቀሙበት እንደነበር የሙዚየሙ አስጎብኚ ይገልፃሉ፡፡ አይንዎትን ዘወር አድርገው ቀና ሲያደርጉ ደግሞ ከ115 አመት በላይ እድሜ ያላቸው እና ከትልቅ ግንድ በሰው ቁመት ልክ ተፈልፍለው የተሰሩ ሁለት ወርቃማ ቅብ ያላቸው ዙፋኖችን ያያሉ፡፡
10882381_10204199552563015_4813752013576469776_n

ከ100 አመት በላይ የቆየ ነጋሪትም በዚሁ ሙዚየም ውስጥ አለ፡፡ ዳግማዊ አፄ ምኒሊክም ዘመቻ አልያም ለየት ያለ ነገር ሲኖር ነጋሪቱን በማስጎሰም ለህዝባቸው ጥሪ ወይም መልዕክት ያስተላልፉበት ነበር፡፡ አፄ ምኒልክ እና እቴጌ ጣይቱ ይጠቀሙባቸው የነበሩ የወርቅ ጥላዎች ፣ የአፄ ኃይለስላሴ እና የእቴጌ መነን ወንበሮች ፣ የነገስታቱ አልባሳት እንዲሁም ከሀገር ውስጥ እና ከውጪ የተበረከቱ ልዩ ልዩ ስጦታዎችም አሉ፡፡ ከእነዚህም በተጨማሪ በሙዚየሙ ባሉ ሁለት የመፅሀፍት መደርደሪያዎች በርካታ የብራና መፅሃፍት ይገኛሉ፡፡
10882233_10204199528762420_1850134163415508578_n

በመጨረሻ ግን የሌላ ሀገር ጎብኚ የእኛን ታሪክ ለማወቅ ሀገር አቋርጦ ፣ ባህር ተሸግሮ ሲመጣ ፣ እኛ አጠገባችን ያለውን ለመጎብኘት ፣ ታሪካችንን ለማወቅ እንዴት ተሳነን? ምላሹን ለእናንተ ትቻለሁ………!!!

Leave a Reply